AIRLINES Etihad и Emirates се на самиот врв на глобалното рангирање на најбезбедни авиокомпании во 2022 година, според анализата на агенцијата за воздушни несреќи со седиште во Хамбург JACDEC.
Водечката германска авиокомпанија Луфтханза се најде на 14-то место по безбедност на глобалното рангирање на 25 најголеми компании, според извештајот објавен во списанието за авијација Aero International. Меѓународниот воздушен сообраќај беше главно безбеден во 2022 година, по прекините поради пандемијата на коронавирус, се вели во извештајот.
Руската војна е нов извор на неизвесност
Аналитичарите, сепак, предупредуваат дека нов извор на неизвесност е руската војна против Украина. Руската авиокомпанија Аерофлот беше оценета значително полошо во новото рангирање, заземајќи го 25-то место, поради незаконското вклучување во рускиот регистар на авиони изнајмени на Запад. Дополнителен проблем е и прекинот на испораката на резервни делови за авиони за Русија поради санкции.
Според експертите, најлошата авионска несреќа во минатата година е падот на Боингот 737-800 на China Eastern Airlines на 21 март, во кој загинаа сите патници и членови на екипажот. Животот го загубија вкупно 132 лица.
Минатата година JACDEC регистрираше вкупно 19 воздухопловни несреќи во светот во кои немаше преживеани, со вкупно 233 загинати лица, односно 60 повеќе од 2021 година, кога, сепак, како што беше наведено, бројот на летови беше значително помал .
Колку луѓе умреле во просек во последните 10 години?
За споредба, во последните 10 години во авионски несреќи во просек загинале 372 лица. Индексот на ризик на JACDEC се базира на податоците за несреќи на секоја авиокомпанија во изминатите 30 години, специфичното опкружување на земјата во која работи и специфичните фактори на ризик.
Иако теоретски е можно да се постигне вредност на индексот од 100 поени, ниту најдобрите авиокомпании не успеваат да го направат тоа. Рејтингот на компанијата ги зема предвид и поминатите километри, па авиокомпанија која поминува повеќе километри без несреќа е подобро рангирана на безбедносната скала.