По втор пат за само неколку дена, илјадници луѓе протестираа во Белград и во другите градови во Србија, изразувајќи го своето незадоволство од зголеменото насилство во земјата.
Неколку часа пред денешниот нов протест на покана на дел од опозицијата, српскиот претседател Александар Вучиќ ги обвинува за „политичка злоупотреба на трагедијата“ по двете масовни убиства во кои загинаа 17 лица, главно деца и млади луѓе, а поддржувачите на Вучиќ повикуваат ги „мршојадците“ на социјалните мрежи“.
Демонстрантите, од друга страна, ги обвинуваат Вучиќ и владата за создавање на средина што доведе до зголемување на насилството во текот на многу години.
И покрај полициската забрана и предупредувањето дека ќе сносат прекршочна и кривична одговорност во случајот со блокирањето на мостот Газела, дел од меѓународниот автопат Е75, демонстрантите го прекинаа сообраќајот.
Ова е втор пат во последните неколку години да биде блокиран дел од овој автопат во Белград.
Пред две години, демонстрантите на еколошките протести го направија токму тоа со цел да го изразат своето несогласување со планот за ископ на литиум во западна Србија.
Во последните години насилството се зголемува во Србија, а минатата недела за само два дена се случија две масовни убиства, прво во основно училиште, а потоа и во село оддалечено околу 50 километри од Белград.
Од почетокот на годинава се евидентирани 17 убиства на жени, а во цела минатата година имало 25.
Србија има проблем и со бројот на оружје во рацете на цивилите, што според некои истражувања ја рангира меѓу лидерите во светот.
По две масовни убиства, државата започна нова кампања за враќање на нелегалното оружје и, според нивните тврдења, во првите четири дена биле предадени околу 10.000 парчиња.
На првиот протест во понеделникот на 8 мај немаше политички говори, извици, музика, свирежи.
Се се одвиваше во тишина во знак на почит кон жртвите на две злосторства.
Слично е и на почетокот на денешниот протест кој исто така се одржува под слоганот Србија против насилството.