Тим од перуански полицајци, од кои еден беше маскиран во Дедо Мраз за да остане „незабележан“, изврши операција против банда дилери на дрога во град северно од Лима, соопштија денеска тамошните власти.
Полицајците успеале да изненадат двајца мажи кои продавале крек и марихуана во куќа во Хуарал, на околу 70 километри од Лима.
„Припадник на група полицајци се маскирал во Дедо Мраз за да остане незабележан во таа опасна област“, соопшти полицијата, додавајќи дека оваа „стратегија е крунисана со успех“.
Полицаецот, кој бил облечен во традиционална носија на Дедо Мраз, имал задача да ја скрши вратата од куќата и да уапси еден од осомничените.
Во акцијата се уапсени две лица и запленети се стотина пакувања со крек и марихуана чија вредност се уште не е утврдена од надлежните органи.
Веќе некое време, перуанската полиција редовно напаѓа осомничени криминалци користејќи маски и спроведува операции започнати на посебни датуми.
Така, на 31 октомври слична акција беше спроведена и на Ноќта на вештерките, исто така против дилери на дрога.