Демократската унија за интеграција (ДУИ) упати жестока реакција по повод неодамнешните изјави и активности на премиерот, оценувајќи ги како „директен напад врз политичкото делување“ и „злоупотреба на државните институции за задушување на етничките и политичките гласови на незадоволство“. Во соопштението, ДУИ тврди дека овие чекори ги потсетуваат на времињата на тоталитаризмот и предупредува дека таквите методи нема да успеат.
„Албанците низ историјата ги преживеале сите обиди за потиснување на нивниот активизам. Ниту заканите ниту злоупотребите на државниот апарат нема да го замолчат стремежот за правда и еднаквост,“ се наведува во соопштението.
ДУИ истакна дека загриженоста поврзана со јазичната политика и другите чувствителни прашања е оправдана и базирана на реалноста. Според партијата, граѓаните, без разлика на нивната партиска припадност, се мобилизираат за заштита на демократијата и општествените вредности.
„Наместо провокации и поделби, премиерот треба да се насочи кон градење доверба меѓу заедниците. Заканите нема да го исплашат народот, кој отсекогаш бил подготвен да се жртвува за правдата и еднаквоста,“ се додава во реакцијата.
Партијата порача дека останува посветена на зачувување на мирот и стабилноста, но дека нема да толерира загрозување на правата на Албанците и останатите граѓани во државата. Со ова, ДУИ уште еднаш нагласи дека е будна и подготвена да се спротивстави на, како што велат, неправедните притисоци и злоупотреби.