Централниот дел на Тексас утрово се соочува со драматични последици од обилни дождови што за само неколку часа ја преплавија земјата, предизвикувајќи нагло зголемување на нивото на реките и катастрофални поплави. Спасувачките и евакуациските операции се во тек, додека властите апелираат до граѓаните да не излегуваат од своите домови.
Националната метеоролошка служба во Сан Анџело предупреди дека „условите се опасни по живот“ и дека поплавите предизвикаа измиени патишта и нагло надојдени потоци. Издадени се најмалку пет вонредни предупредувања за поплави – највисоко ниво на тревога – за делови од окрузите Том Грин, Кер и Кендал.
Округот Кер, околу 120 километри западно од Остин, утрово е најтешко погоден. Канцеларијата на шерифот објави дека поплавите однеле човечки животи, но нема да се откријат детали додека не бидат информирани семејствата на жртвите. „Целиот округ е во состојба на вонредна активност. Останете на безбедно и не патувајте“, стои во соопштението.
Во Кервил, градоначалникот Џо Херинг Џуниор прогласи вонредна состојба, а полицијата и пожарникарите учествуваат во спасувачки мисии. Два парка се затворени, а посетителите во паркот Кервил-Шрајнер беа евакуирани утрово кога водата влезе во изнајмените колиби.
Во Сан Анџело, град со речиси 100.000 жители, локалната полиција повика граѓаните да се засолнат и да избегнуваат патувања. На некои локации наврнале и над 25 сантиметри дожд за неколку часа – количина што вообичаено паѓа во текот на цело лето.
Особено драматична ситуација се развила кај реката Гвадалупе, каде што нивото на водата се зголемило за 6,7 метри во рок од три часа. Националната метеоролошка служба предупреди на „голем и смртоносен бран поплави“ што се движи низ долината на реката. Еден од мерачите на нивото на водата е оштетен поради силата на надојдената вода.
Овие поплави се уште еден алармантен доказ за ефектите од климатските промени. Научните анализи покажуваат дека екстремните врнежи стануваат почести и поинтензивни, делумно поради глобалното затоплување и зголеменото испарување од океаните. Од 1970 година, 90% од големите американски градови бележат значително интензивирање на врнежите во краток период.
Синоптичарите предупредуваат дека дождовите ќе продолжат во текот на денот, со можност за нови поплави и влошување на ситуацијата. Надлежните служби остануваат на терен, а јавноста е повикана на максимална претпазливост и следење на официјалните известувања.