Вработените во Инспекторатот за употреба на јазиците денеска јавно се огласија со драматично и остро отворено писмо, во кое алармираат дека веќе шест месеци живеат без плата, без статус и без никаква иднина, додека институциите молчат и, како што велат, го игнорираат нивното постоење и нивната егзистенција.
„Не ви пишуваме како функционери, не ви се обраќаме со соопштение. Ви пишуваме како луѓе кои шест месеци преживуваат со кредити и вересија, понижени, игнорирани и оставени без никакво човечко достоинство,“ се вели во писмото.
Според нивните наводи, Министерството за правда, под водство на Игор Филков, им должи три плати – за април, мај и јуни, а платата за јули, велат, е целосно непокриена. Тврдат дека и покрај тоа што Собранието на 24 јуни изгласало закон со кој се задолжува Министерството да ги преземе вработените во рок од 30 дена, таа обврска досега не е исполнета.
„Рокот истече. Реакција – нула. Одговор – нула. Интерес – уште помалку,“ стои во пораката.
Покрај Министерството, вработените ја обвинуваат и Владата, предводена од премиерот Христијан Мицкоски, дека е целосно информирана за проблемот, но ништо не презема.
„Доколку не реагира веднаш, Владата ја презема целата одговорност за уништување на судбините на десетици семејства,“ додаваат тие.
Во писмото се посочуваат и сериозни обвинувања на адреса на актуелниот директор Арсим Идризи, за кого велат дека институцијата ја користел за јавни набавки на сокови, за фотографирања и за вработувања на партиски кадри, додека редовните вработени останувале без примања и статус.
„Ова не е молба. Ова е аларм,“ порачуваат тие.
Вработените најавуваат дека својата борба ќе ја продолжат гласно и јавно – преку медиуми, портали и протести, особено во периодот пред избори.
„Ќе бидеме таму – со гласот што нема да го угасите, со вистината што нема да ја закопате. Со решеност каква што досега не сте виделе,“ заклучуваат вработените во Инспекторатот за употреба на јазиците.