Пилот на полските воздухопловни сили загина денеска откако неговиот борбен авион Ф-16 се урна за време на проба за аеромитинг во градот Радом, централна Полска, потврди владиниот портпарол.
Според извештаите на полските медиуми, несреќата се случила околу 19:30 часот по локално време (17:30 по Гринич), кога авионот удрил во пистата и предизвикал значителна штета на неа.
Трагичната вест за смртта на пилотот ја потврди портпаролот на владата, Адам Шлапка, преку објава на социјалната мрежа Х, но не соопшти повеќе детали за инцидентот или за идентитетот на загинатиот.
Како директна последица на несреќата, познатиот аеромитинг „Радом Ер Шоу“, кој беше планиран да се одржи претстојниот викенд, е откажан.
Се очекува истрагата да ги утврди причините за падот на леталото.