Дваесет и шест земји се подготвени да учествуваат во меѓународни сили како дел од безбедносните гаранции за Украина во случај на мировен договор со Русија, објави денес францускиот претседател Емануел Макрон по самитот на сојузниците на Киев.

Макрон не прецизираше кои земји се подготвени да распоредат војници во Украина.
„Како форма на зајакнување на мирот, 26 земји се обврзаа да распоредат трупи во Украина, каде што ќе бидат присутни на копно, на море или во воздух“, изјави Макрон пред новинарите, стоејќи до украинскиот претседател Володимир Зеленски во Елисејската палата во Париз.

Францускиот претседател не кажа кои земји ги понудија своите војници, но се знае дека меѓу нив се Франција и Велика Британија.

За Македонија во моментов нема информации.

Макрон рече дека тој, неговите колеги европски лидери и украинскиот претседател разговарале телефонски со американскиот претседател Доналд Трамп по самитот и дека придонесот на САД кон планираните гаранции ќе биде финализиран во наредните денови.

Од европските земји во коалицијата, подготвени се Белгија, Бугарија, Хрватска, Кипар, Чешка, Данска, Естонија, Финска, Германија, Грција, Исланд, Ирска, Италија, Латвија, Литванија, Луксембург, Холандија, Норвешка, Полска, Португалија, Романија, Словенија, Шпанија и Шведска, како и Канада, Австралија, Јапонија и Нов Зеланд.

Трамп ѝ порача на Европа да престане да купува руска нафта

За време на телефонскиот разговор со лидерите на „коалицијата на добронамерните“, Трамп рече дека Европа мора да престане да купува руска нафта , за која вели дека ѝ помага на Москва да ја финансира нејзината војна против Украина, изјави официјален претставник на Белата куќа.

„Претседателот, исто така, нагласи дека европските лидери мора да извршат економски притисок врз Кина за финансирање на воените напори на Русија“, рече функционерот.

Путин вели дека е подготвен за разговори, но ја исклучува можноста за војници

Путин вчера му рече на Киев дека постои можност за завршување на војната во Украина преку преговори „доколку преовлада здравиот разум“, опција за која вели дека ја претпочита.

Рускиот претседател, исто така, ја отфрли можноста за распоредување трупи од земјите на НАТО во Украина како дел од мировниот договор. Но, генералниот секретар на НАТО, Марк Руте, ги отфрли неговите приговори.

„Зошто ни е гајле што мисли Русија за трупите во Украина? Тоа е суверена земја“, изјави тој на конференција во Прага пред да се приклучи на самитот во Париз преку видео врска. „Русија нема никаква врска со ова“, рече тој. „Мислам дека навистина треба да престанеме да го прикажуваме Путин како многу моќен“.

Претседателката на Европската комисија, Урсула фон дер Лајен, во четвртокот по состанокот на таканаречената „коалиција на добронамерните“ изјави дека постои решеност украинските воени сили да се направат толку силни што ќе станат „челичен еж несварлив за сегашните и идните агресори“.

„Ќе ја претвориме Украина во челичен еж“

„Мораме да ја претвориме Украина во челичен еж, несварлив за сегашните и идните агресори. Ова значи постојани вооружени сили кои се силни, добро опремени и модерни“, рече фон дер Лајен, додавајќи дека денешниот состанок донел конкретни резултати.

Таа рече дека 26 земји на состанокот на „коалицијата на добронамерните“ изразиле подготвеност да распоредат свои сили во Украина во случај на прекин на огнот.

Главната тема на состанокот одржан во Париз, каде што повеќето учесници учествуваа преку видео врска, беа безбедносните гаранции за Украина. Фон дер Лајен рече дека првата и најсилна линија на безбедносните сили се силни украински вооружени сили.

Вториот слој на безбедносни гаранции се силите за уверување, вклучувајќи ја и поддршката од САД, рече претседателката на Комисијата. „Денес, 26 земји се обврзаа на такви сили за уверување, во контекст на прекин на огнот или мировен договор, 26 земји се подготвени да распоредат сили на копно, во воздух или на море“, рече фон дер Лајен, без да прецизира за кои земји.