НАТО се состана поради руските упади во воздушниот простор на своите членки: „Тие се неодговорни“

Началниците на генералштабовите на вооружените сили на земјите-членки на НАТО се состанаа денес во Рига, Латвија, за да разговараат за повеќекратните руски нарушувања на воздушниот простор на западниот воен сојуз.

„Денес ја изразувам мојата целосна и недвосмислена солидарност со сите сојузници чиј воздушен простор е нарушен. Одговорот на алијансата беше силен и само ќе продолжи да станува посилен“, рече адмиралот Џузепе Каво Драгоне, претседател на Воениот комитет на НАТО, организацијата со 32 члена, во воведниот говор.

„Нарушувањата на воздушниот простор претставуваат чин на неодговорна ескалација што ги загрозува животите, а Русија сноси целосна одговорност за овие дејствија“, рече Драгоне.

Драгоне посочи на историските настани, истакнувајќи дека на 25 септември 1939 година, советски бомбардер и извидувачки авион го нарушиле воздушниот простор на Латвија, Литванија и Естонија, опишувајќи го тоа како „почетен сигнал за решителноста на Москва да ја наметне својата волја“.

„Тој момент треба длабоко да резонира со нас денес“, рече тој.

Во своето обраќање, латвискиот претседател Едгарс Ринкевич рече: „Итен приоритет денес е очигледно воздушната одбрана“.

Според него, „Русија продолжува со низа провокации, а неодамна небрежно го наруши воздушниот простор на Полска и Естонија“.

Ринкевичс повика на продолжување на силниот одговор што ќе го претвори чувањето на балтичкиот воздушен простор во мисија за воздушна одбрана на Балтичката област со соодветни правила на ангажирање.

Русија постојано го напаѓа воздушниот простор на членките на НАТО над Балтикот и Полска.

Воениот комитет на НАТО ги советува членките на НАТО за воени прашања. Една од целите на тековната конференција е да се спроведат одлуките донесени на самитот на НАТО во Хаг на крајот на јуни.