Во семејна куќа во германскиот град Солмс во сојузната покраина Хесен, полицијата и спасувачките екипи попладнево пронајдоа три безживотни тела, додека едно лице е однесено во болница со тешки повреди, објави „Билд“.
Според првичните информации, полицијата добила неколку итни повици околу 11 часот утрово. Сведоците изјавиле дека забележале повредено лице во дворот на куќа во населбата Нидербил во градот.
По пристигнувањето на местото на настанот, полициските патроли пронашле лице со повреди на главата, кое веднаш било однесено во најблиската болница од страна на службите за спасување.
Телата на три лица биле пронајдени во куќата. Лекарот од итната помош можел само да ја потврди нивната смрт. Околностите на овој инцидент се уште се целосно нејасни.
Идентитетите, полот и врските на жртвите засега се непознати, а канцеларијата на државниот обвинител и полицијата започнаа обемна истрага за да се утврди причината за смртта.