Германскиот парламент, Бундестагот, во петокот одобри закон со кој ќе се реформира системот за воена служба во земјата, воведувајќи задолжителни медицински прегледи за младите мажи, а воедно задржувајќи ја доброволната регрутација.
Почнувајќи од јануари 2026 година, сите 18-годишни мажи родени во 2008 година ќе мора да поминат лекарски преглед за регрутација. Пред тоа, тие мора да пополнат прашалник дизајниран да обезбеди првични информации за нивната способност за воена служба. Учеството во лекарскиот преглед и прашалникот останува доброволно за жените, пишува списанието Феникс.
Се очекува прашалникот, кој ја проценува заинтересираноста за служење во германските вооружени сили (Бундесвер), да трае само неколку минути, објавуваат германските медиуми.
Вака изгледа прашалникот за млади мажи
Со оваа реформа, владата под канцеларот Фридрих Мерц (CDU) реагира на недостигот на персонал во Бундесверот и се фокусира на рано информирање на младите луѓе за опциите за воена служба.
Според германските медиуми, во прашалникот, меѓу другото, ќе бидат побарани следниве информации:
- Пол
- Брачен статус
- Државјанство
- Интерес за воена служба
- Висина и тежина
- Постоење на тешка попреченост или еквивалентен статус
- Физичка подготвеност и спортски активности
Други квалификации како што се познавање на странски јазици или програмски вештини
Мажите кои нема да го пополнат прашалникот или ќе дадат лажни информации се соочуваат со парична казна.
Министерството за одбрана има за цел да го прошири Бундесверот на околу 270.000 активни војници до 2035 година. Ова би барало околу 20.000 нови регрути секоја година.
Германија ја укина задолжителната воена служба во 2011 година, преминувајќи на целосно доброволна професионална сила.