Таткото и синот обвинети за терористичкиот напад на Бонди Бич во Сиднеј, во кој загинаа 15 лица на 14 декември, го планирале нападот со месеци и вежбале со огнено оружје, според судски документ објавен во австралиските медиуми, пренесува CNN.
Според судскиот документ, Саџид Акрам (50) и неговиот син Навид (24) биле снимени како тренираат со пушки на неоткриена рурална локација во австралиската држава Нов Јужен Велс, каде што може да се видат како се движат и пукаат на начин што укажува на тактичка обука.
Во документот се наведува дека осомничените фрлиле четири импровизирани експлозивни направи во толпата непосредно пред пукањето на Бонди Бич, но ниту една од нив не експлодирала.
Полицијата вели дека три цевни бомби и една експлозивна направа скриена во тениско топче биле функционални, а друга бомба е пронајдена во возилото што го користеле напаѓачите.
Саџид бил убиен за време на полициската интервенција, додека Навид бил ранет.
Навид е обвинет за тероризам, 15 убиства и 40 обиди за убиства.
Во судскиот документ, исто така, се наведува дека осомничените снимиле видеа со екстремистички пораки, во кои, меѓу другото, изразиле ставови што укажуваат на религиозно мотивиран насилен екстремизам.
Полицијата тврди дека таткото и синот ја посетиле локацијата каде што подоцна било извршено пукањето два дена пред нападот, што се смета за извидување и планирање терористички чин.
Според документите, Навид одбил да даде изјава на полицијата од неговата болничка соба по совет на неговиот адвокат, а неговото следно појавување пред суд е закажано за април.
Нападот на 14 декември бил насочен кон група еврејски семејства кои го слават празникот Ханука, потврдија австралиските власти.