Огромен интерес и вистински колапс на системот предизвика најавата за гостувањето на светската диџеј ѕвезда Давид Гета во Скопје. Организаторот „Avalon International Booking“ попладнево излезе со итно соопштение до јавноста.
Поради енормна преоптовареност на системот и рекорден број посетители на сајтот во ист момент, продажбата на влезници е моментално прекината. Од „Авалон“ објаснуваат дека ова е неопходен чекор за да се сумираат досегашните трансакции.
„Продажбата е стопирана со цел досегашните продажби да се сумираат и процесираат, и сите оние кои досега имаат купено влезници да ги добијат на својот e-mail“, стои во официјалното соопштение.
Од продукцијата ги смируваат фановите кои сè уште не успеале да дојдат до билет, нагласувајќи дека влезници сè уште има и дека продажбата ќе продолжи наскоро. Тие апелираат за трпение додека техничките екипи не го стабилизираат процесот.
Концертот на Давид Гета во рамките на неговата турнеја „The Monolith Tour“ е закажан за 8 септември 2026 година на Арената „Тодор Проески“ во Скопје. Со оглед на денешниот хаос, јасно е дека ова ќе биде еден од најголемите музички настани во историјата на Македонија.