Израелската војска соопшти дека во текот на нови операции во Појасот Газа елиминирала повеќе високо рангирани припадници на Хамас, одговорни за финансиските текови, техничката поддршка и воената инфраструктура на оваа палестинска организација.
Според тврдењата на Израелските одбранбени сили (ИДФ), станува збор за лица кои имале клучна улога во финансирањето и обновата на воените капацитети на Хамас по повеќемесечните судири.
Меѓу убиените е, според ИДФ, Ихаб Хризим, кого израелските власти го опишуваат како еден од главните финансиски оперативци на Хамас. Израел тврди дека тој бил задолжен за пренос на милиони долари кон военото крило на Хамас и за организирање на финансиска мрежа што се користела за набавка на оружје и логистика.
Убиен и нов воен командант на Хамас
Израел истовремено ја потврди и ликвидацијата на Мохамед Одех, кој неодамна бил именуван за нов шеф на военото крило на Хамас по смртта на неговиот претходник, наведува VOE. Според израелските тврдења, Одех бил поврзан со планирањето и изведувањето на нападите на Хамас врз Израел на 7 октомври 2023 година.
Израелскиот министер за одбрана Израел Кац изјави дека Израел „ќе продолжи да ги лови сите одговорни за масакрот од 7 октомври“, додавајќи дека сите лидери на Хамас се „обележани“.
Според информации од Газа, во текот на нападите биле погодени згради во централните делови на градот, а палестински извори наведуваат дека меѓу загинатите има и цивили. Хамас засега не објави детални информации за бројот на жртви, ниту официјално ги коментира тврдењата за улогата на убиените оперативци.