Австралиската полиција соопшти дека спровела „најголемо досега“ запленување на кокаин во земјата, при што во западниот дел на Сиднеј се конфискувани 2,7 тони од наркотикот.
Според Австралиската федерална полиција, наркотикот, со пазарна вредност од 816 милиони австралиски долари (57,1 милиони долари), бил откриен скриен во сложен систем од подземни бункери на имот во Лондондери.
Дрогата била извадена од бункери поставени под лажни подови во три транспортни контејнери на задниот дел од имотот. Полицијата наведе дека количината би била доволна за приближно три милиони улични дози.
Конфискацијата е дел од едномесечна заедничка истрага на федералната полиција и полицијата на Квинсленд, започната откако локални службеници, пристигнувајќи на местото на пожар во Миџ Појнт, забележале околу 40 килограми кокаин што пловеле во близина. Според полицијата, пожарот бил обид да се уништат докази за увозот.
Обвиненија се подигнати против неколку лица во врска со наводната шема за увоз на дрога, а нивните случаи сè уште се разгледуваат пред суд.