Во екот на летните горештини, кога температурите не се намалуваат ниту по зајдисонце, клима-уредот стана неопходен во многу домови. Сепак, експертите предупредуваат дека иако климатизацијата може да помогне полесно да заспиете, неправилното користење во текот на ноќта може да го наруши квалитетот на сонот и да предизвика здравствени непријатности.
Според нив, проблемот не е во тоа дали климата е вклучена, туку како се користи. Ако просторијата се излади премногу, телото троши дополнителна енергија за да ја одржи нормалната телесна температура, што може да доведе до почесто будење, прекин на длабокиот сон и чувство на замор следното утро, иако сте спиеле доволно долго.
Многумина навечер ја поставуваат климата на 21 или 22 степени, но како што надворешната температура опаѓа, уредот продолжува да лади со ист интензитет. Затоа, стручњаците препорачуваат користење на тајмер и исклучување на климата по еден до два часа од заспивањето.
Дополнително, клима-уредот го суши воздухот, па кај некои луѓе може да предизвика суво грло, затнат нос, чешање на очите или иритација на дишните патишта. Особено внимателни треба да бидат лицата кои страдаат од алергии, бидејќи нечистите филтри можат да задржуваат прашина, полен и други алергени. Затоа се препорачува редовно чистење и одржување на уредот, како и кратко проветрување на просторијата во вечерните часови.
Експертите советуваат ладниот воздух никогаш да не биде насочен директно кон креветот. Во спротивно, може да се појават болки и вкочанетост во мускулите, особено кај луѓето кои веќе имаат проблеми со вратот, рамената или грбот.
Освен што може да влијае на квалитетот на сонот, клима-уредот кој работи цела ноќ ја зголемува и потрошувачката на електрична енергија. Користењето на автоматски режим или тајмер не само што ќе ја намали сметката за струја, туку ќе го продолжи и работниот век на самиот уред.
За попријатен сон во топлите ноќи, стручњаците препорачуваат просторијата да се проветри десетина минути пред спиење, преку ден да се држат спуштени ролетните или завесите за да се спречи загревање на домот, да се користи лесна памучна постелнина и температурата на климата да биде умерена.
Клима-уредот сам по себе не е штетен за време на спиењето, но начинот на кој се користи може значително да влијае врз квалитетот на одморот и здравјето. Со правилно поставена температура и редовно одржување на уредот, утрата можат да започнат со повеќе енергија, наместо со замор и вкочанетост.