Зголемен број пожари на отворен простор се регистрирани во текот на денешниот ден, а најголем дел од нив сè уште се активни. Центарот за управување со кризи информира дека до 13:00 часот се евидентирани вкупно 17 пожари, од кои 11 се активни, три се под контрола, а три се целосно изгаснати.
Најголем број активни пожари има во прилепскиот регион, но огнени жаришта има и во повеќе други општини низ земјата.
11 активни пожари
Во општините Студеничани и Зелениково активен е пожарот што се протега од селото Моране, преку Вртекица и Рамни Габер, со крак кон Палиград и над селото Вражале. Гори мешана шума.
Во Студеничани, активен е и пожарот кај селото Цветово, на стариот пат кон Елово, каде што е зафатена ниска вегетација и шума.
Во Македонски Брод, пожарот во месноста Видуш, кај селата Драгов Дол и Локвица, зафатил ниска вегетација, нискостеблеста шума и грмушки.
Активни пожари има и во Кичево, кај селото Тајмиште, месност Дарда, каде што гори високостеблеста букова шума, како и во Врапчиште, кај селото Ломница, каде што е зафатена мешана шума.
Во Маврово и Ростуше, активен е пожар кај селото Церово, каде што гори ниска вегетација и нискостеблести растенија. Пожар е активен и во Желино, кај селото Церово, со зафатена ниска вегетација и папрат.
Во прилепскиот регион активни се пожари кај селата Бонче, Мажунчиште и Коњари, каде што е зафатена ниска вегетација и нискостеблести растенија.
Активен пожар е регистриран и во Струмица, кај селото Водоча, каде што гори стрниште.
Три пожари под контрола
Под контрола се пожарите во Прилеп, кај селото Чаниште, со краци кон Крушевица, Лопатица, Дуње и Црна Река, потоа во Липково, кај селото Никуштак, како и во Тетово, кај селото Бродец.
Три пожари изгаснати
Целосно се изгаснати пожарите кај селото Белушино во Крушево, со крак кон Јакреново, пожарот во месноста Стари Лозја во Куманово, како и пожарот на депонијата во Делчево.