По повеќедецениски обиди за нивно враќање во Бугарија, посмртните останки за кои се смета дека му припаѓаат на цар Самоил ќе бидат предадени на бугарската држава и пренесени од Грција во Софија. Договорот меѓу двете земји предвидува официјалното предавање да се случи на 3 октомври во Музејот на византиската култура во Солун.
По церемонијата, останките ќе бидат транспортирани до Софија со бугарски воен авион „Спартан“, а потоа ќе бидат положени во посебен саркофаг во црквата „Света Софија“. Ова го соопшти бугарскиот премиер Румен Радев.
Останките биле откриени во базиликата „Свети Ахил“ на остров во Малото Преспанско Езеро од грчкиот археолог Николаос Муцопулос. Според достапните информации, археолошките истражувања довеле до откривање на четири саркофази со останки поврзани со династијата на Самоил.
Бугарија со години бара нивно враќање, а актуелниот договор меѓу Софија и Атина опфаќа и размена на историски и религиозни предмети. Според договорот, во Грција треба да бидат вратени и 48 историски предмети кои се наоѓаат во Бугарија.
Бугарските власти го оценија договорот како значаен чекор по повеќедецениските напори за враќање на останките на Самоил. Според Радев, станува збор за процес кој трае околу шест децении.