Вонредна состојба во американскиот авионски сообраќај. Федералната воздухопловна администрација на САД (FAA) нареди запирање на сите полетувања од американските аеродроми до понатамошно известување, поради сериозен проблем во комуникацискиот систем за контрола на летање.
Одлуката е донесена поради, како што соопшти FAA, „вонредни околности и безбедносни причини“, а прекинот ги опфаќа аеродромите низ целата земја. Меѓународните летови што пристигнуваат во САД ќе се разгледуваат поединечно.
Според првичните информации, дефектот ги погодил регионалните центри за контрола на воздушниот сообраќај, кои се задолжени за координација на авионите што летаат меѓу американските аеродроми.
The @FAAnews issued a nationwide ground stop for all U.S. airports following a communication issue impacting all Air Route Traffic Control Centers. FAA technicians are investigating the issue. We will provide immediate updates as we have them.
— Secretary Sean Duffy (@SecDuffy) November 13, 2026
Американскиот министер за транспорт Шон Дафи го потврди проблемот и информираше дека техничките екипи на FAA работат на утврдување на причините за прекинот. Засега нема официјална потврда дека станува збор за кибернапад.
Според платформата за следење авиони „Флајтрадар24“, во моментот кога била издадена наредбата, околу 3.100 авиони веќе биле во воздух и се движеле кон американските аеродроми.
There are currently 3,100 airborne aircraft bound for US airports amid nationwide ground stop. No additional aircraft are taking off at this time. https://t.co/GGqfb8QXhP
— Flightradar24 (@flightradar24) November 13, 2026
Станува збор за исклучително ретка мерка во американскиот авионски сообраќај. Последен пат вакво запирање на полетувањата на национално ниво беше наредено во јануари 2023 година, по дефект во системот за известување на пилотите. Претходно, слична одлука беше донесена по терористичките напади на 11 септември 2001 година.
Инцидентот повторно ги отвори прашањата за застарената воздухопловна инфраструктура во САД. Американскиот Конгрес минатата година одобри 12,5 милијарди долари за модернизација на системот, додека за дополнителни подобрувања се бараат уште околу 30 милијарди долари.
Надлежните служби продолжуваат да ја испитуваат причината за дефектот, а засега не е соопштено кога авионскиот сообраќај целосно ќе се нормализира.