Министерот за здравство, Азир Алиу, денеска упати жесток прекор до надлежните институции, нарекувајќи го „жално и непрофесионално“ децениското чување на 10 тони опасен хемиски отпад во срцето на Скопје.
Откако отпадот конечно беше отстранет од Институтот за јавно здравје (ИЈЗ), Алиу побара итно лоцирање на одговорноста за оваа долгогодишна еколошка закана.
Министерот беше дециден дека вакви пропусти не смеат да се премолчат. Иако неговиот ресор се погрижил за чистење на теренот, тој сега ја префрла топката кај истражните органи.
„Наша надлежност е да имаме околина која не е контаминирана и тоа го направивме. Понатаму, институциите ќе треба да делуваат и да најдат зошто толку време овој отпад бил во центарот на Скопје. Тоа е жално и непрофесионално во најмала рака“, изјави Алиу.
На прашањето дали и во другите клиники и болници се крие сличен опасен отпад, министерот не ја исклучи таа можност.
Алиу призна дека во моментов нема конкретни информации за други локации.
- Сепак, тој додаде дека со оглед на досегашната пракса, „нема да го изненади“ доколку се откријат нови жаришта низ државата.
Додека Алиу бара одговори, директорката на ИЈЗ, Марија Андоновска, потврди дека хаваријата е спречена во последен момент:
- Отпадот е професионално отстранет по повеќе од 10 години непрописно чување.
- Материјалот нема да се уништува во Македонија, туку ќе биде транспортиран и согорен во соодветни капацитети во странство.
