Два силни земјотреси ја погодија Венецуела во средата. Епицентарот беше во градот Морон, во државата Карабобо, но најголеми последици претрпеа и други региони, меѓу кои и крајбрежниот град Ла Гваира. Според податоците што ги соопшти привремената претседателка на земјата, Делси Родригез, најмалку 164 лица загинаа, а околу 971 се повредени.
По катастрофата, аргентинскиот фудбалер Лукас Трејо, кој настапува за клубот Маритимо од Ла Гваира, преку социјалните мрежи упати очаен апел за помош во потрагата по своето семејство – неговата партнерка Јанина Маранела и нивните две деца, Арон и Аинхоа Трејо Маранела.
„Не знам ништо за моето семејство. Молете се за нив. Сакам да верувам дека не биле таму“, напиша 38-годишниот фудбалер, мислејќи на станбената зграда во населбата Плаја Гранде, каде што неговите најблиски исчезнале по земјотресот.
Кој е Лукас Трејо?
Лукас Трејо е роден на 29 декември 1987 година во аргентинската покраина Кордоба. Игра како левоног централен дефанзивец, а својата кариера ја започнал во локалните клубови Лас Флорес и Аталаја.
Бидејќи не успеал да се пробие во повисоките рангови во Аргентина, по препорака на поранешниот фудбалер на Бока Јуниорс и Ривер Плата, Хозе Луис Виљареал, заминал во Шпанија, каде што добил шанса во Л’Ескала.
На 16-годишна возраст тренирал под водство на Гиљермо Хојос, денешен тренер во Интер Мајами, а потоа ја продолжил кариерата во грчкиот Атромитос. Подоцна се вратил во Аргентина, каде што играл за Спортиво Белграно и Расинг Кордоба, пред да премине во Институто.
Пресвртницата во неговата кариера се случила во 2017 година, кога потпишал за венецуелскиот Монегас. Таа сезона ги одиграл сите натпревари, бил капитен на екипата и ја освоил шампионската титула. Следната година настапил и во Копа Либертадорес.
Познат по прекарот „Генералот“, Трејо стекнал голема репутација во венецуелскиот фудбал. Во кариерата настапувал и за Депортиво Тачира, Португеса, Нуева Еспарта и Замора, а имал и кратки епизоди во Мексико, Колумбија и Перу.
Од февруари годинава е член на Маритимо од Ла Гваира. Наместо да се подготвува за завршницата од својата кариера, аргентинскиот дефанзивец денес се соочува со најтешката битка во животот – потрагата по својата партнерка и двете деца, кои исчезнаа по разорните земјотреси во Венецуела.