Автопилотот го изврши првото автономно итно слетување на авион по дефект

За првпат во историјата на авијацијата, систем за „автономно слетување“ целосно самостојно приземји авион во вистинска итна ситуација. Драмата се одвивала на 20 декември над Колорадо, САД, кога леталото наеднаш изгубило притисок во кабината.

Системот Garmin Autoland ја презел контролата врз двомоторниот турбопропелерски авион Beechcraft Super King Air, комуницирал со контролата на летање и безбедно го спуштил авионот на пистата, додека пилотите ја надгледувале ситуацијата со маски за кислород.

Прва употреба во реална опасност

Од компанијата „Гармин“ потврдија дека ова е историски момент.

„Ова беше прва употреба на Autoland од почеток до крај во вистинска итна ситуација“, изјавија од компанијата.

Иако системите за автоматско слетување (ILS) се користат со децении за помош при магла, овој систем е различен – тој е дизајниран за најлошото сценарио: кога пилотот е онеспособен (мртов или онесвестен).

Што точно се случило?

1. Губење на притисок: Авионот доживеал брз и неконтролиран пад на притисокот (декомпресија).
2. Активација: Бидејќи висината во кабината станала небезбедна, системот „Гармин“ автоматски се активирал, претпоставувајќи дека пилотите се онесвестени.
3. Комуникација: Вештачката интелигенција сама избрала аеродром (Rocky Mountain Metropolitan), пресметала рута и ја известила контролата: „Итно автоматско слетување, 19 минути од пистата 30R“.
4. Слетување: Авионот слетал околу 14:20 часот, а пилотите излегле неповредени.

Пилотите биле будни, но го пуштиле „роботот“

Иако системот првично ја известил контролата дека пилотите се „онеспособени“, истрагата покажала дека тие биле свесни. Откако ги ставиле маските за кислород, тие донеле професионална одлука – да го остават системот вклучен.

„Пилотите свесно одлучија да ги користат сите достапни алатки и да ги минимизираат ризиците во оваа непредвидлива ситуација. Тие беа подготвени да ја преземат контролата доколку системот потфрлеше“, изјави Крис Таунсли од авиокомпанијата Buffalo River Aviation.

Американската управа за авијација (FAA) го истражува инцидентот, кој се смета за пресвртница во безбедноста на небото.