Во првото тримесечје од 2025 година, активното население во Македонија броело 795.007 лица, од кои 702.410 биле вработени, а 92.597 евидентирани како невработени, соопшти Државниот завод за статистика (ДЗС). Стапката на невработеност во овој период изнесува 11,7 проценти.
Во споредба со последниот квартал од 2024 година, бројот на невработени е намален за 2,3 проценти, додека во однос на истото тримесечје лани, падот достигнува 8,8 проценти.
Според родова структура, од вкупниот број невработени лица, 59,8 проценти се мажи, а 40,2 проценти се жени.
Паралелно со падот на невработеноста, ДЗС регистрира и раст на неформалната вработеност. Во првиот квартал од 2025 година, 90.383 лица работеле неформално – што е зголемување од 10,7 проценти во однос на четвртото тримесечје од 2024 година.
Најголем дел од неформално вработените се ангажирани во земјоделството, шумарството и рибарството (47,8%), додека значителен удел има и градежниот сектор (16,7%).
Надлежните укажуваат дека и покрај позитивниот тренд кај вработеноста, порастот на неформалниот труд претставува предизвик за пазарот на труд и за социјалната сигурност на работниците.