Гостите на хотелот во Вела Лука пријавиле труење со храна, но на крајот се испоставило дека станува збор за гастроинтестинален вирус.
Турист од Босна и Херцеговина кој со сопругата и детето престојувал во хотелот „Адриа“ во Вела Лука пријавил труење со храна, а тврдел дека истата судбина ги снашла и некои други гости на хотелот.
Меѓутоа, директорот на хотелот Дениј Сурјан за Слободна Далмација открива:
„По пријавата веднаш контактиравме со санитарната инспекција во Корчула, како и со Епидемиолошката служба. Земале примероци од столицата од неколку вработени и гости, како и брисеви од површините и утврдиле дека нашите клиенти не заболеле од труење со храна, туку од гастроинтестинален вирус. Како што ни рекоа од Итната помош Блато, само едно лице имало посилни симптоми и веќе следниот ден била многу подобро, таа заминала на патување со семејството. Иако имаше случаи и во други објекти, решивме да им ги вратиме парите на паровите од БиХ, кои се пожалија на наводно труење со храна“.
Покрај тоа лице лекарска помош побарале уште две лица кои престојувале во други објекти. Но, и во Вела Лука и во Корчула се појавила гастроинтестинална вироза, што, велат експертите, не е невообичаено во текот на летните месеци. Неколку лица се пожалија на симптомите, а директорот на жупанискиот Институт за јавно здравје д-р Мато Лакиќ е сигурен дека воопшто не се работи за труење со храна, туку за обичен летен вирус.
„Санитарната инспекција и епидемиолозите излегоа на увид, земавме мостри и констатиравме дека се работи за летен вирус. Тројца побарале лекарска помош, останатите не ни посетиле лекар поради благи симптоми, а тоа се луѓе кои се врзани за различни сместувачки единици, а не само за еден хотел“.
Вирусите можат да се шират преку храната, но првенствено се шират од човек на човек, особено во лето кога има многу поголем контакт, на пример меѓу децата на плажа, објаснува Лакиќ за Слободна.
