Со наближувањето на првиот училишен ден, семејните буџети повторно се соочуваат со дополнителни трошоци за опремување на учениците. За да се намали финансискиот товар за родителите, Владата денеска треба да донесе одлука за воведување на нова „училишна кошничка“.
Мерката, според најавите, треба да опфати дел од најчесто купуваните производи за учениците, со намалување на цените до 15 проценти. Договорот е постигнат меѓу Министерството за економија и трговците, а целта е да се спречи зголемување на цените во периодот кога побарувачката за училишен прибор значително расте.
Во „училишната кошничка“ треба да бидат вклучени производи како ранци, тетратки, пенкала, моливи, боички, фломастери и друг прибор потребен за секојдневната настава.
Различни пакети во зависност од продавницата
Годинава се предвидува поинаков модел во однос на претходните две години. Наместо единствен пакет со однапред утврдени производи, секој трговец ќе има можност самостојно да ја креира својата понуда.
Тоа значи дека во различни продавници ќе има различни комбинации на производи, а цената ќе зависи од тоа што содржи пакетот, како и од брендот и квалитетот на производите.
На овој начин, родителите ќе имаат можност да избираат помеѓу различни варијанти според потребите и финансиските можности.
Од надлежните потсетуваат дека сличната мерка во изминатите две години овозможила заштеда од околу 2.000 денари по ученик.
За прваче приборот може да достигне и 10.000 денари
И покрај најавеното намалување, подготовката за првиот училишен ден останува значителен трошок, особено за родителите на првачињата.
За основниот прибор на едно прваче се потребни најмалку околу 5.000 денари, додека со набавка на дополнителни производи и поквалитетна опрема, сумата може да достигне од 7.000 до 10.000 денари.
Во трошоците влегуваат тетратки, пенкала, моливи, боички, фломастери и прибор за цртање, но и ранец и други производи што се потребни за почетокот на учебната година.
Со „училишната кошничка“ институциите очекуваат да се намали притисокот врз семејните буџети во периодот кога трошоците за учениците традиционално се зголемуваат.
Конечните детали, опфатот на производите и начинот на примена на мерката треба да бидат утврдени со одлуката што се очекува да биде донесена на денешната владина седница.