Либерално-демократската партија (ЛДП), поради сѐ почестите сообраќајни метежи и колони на патиштата низ државата, побара итно поставување на М-ТАГ уреди за електронска наплата на секоја патарина во Македонија, објави порталот „Скопје1.мк“.
Преку видео-обраќање, членот на Извршниот одбор на ЛДП, Бобан Јанкоски, упати остри критики за неажурноста и лошата организација која секојдневно ги заглавува граѓаните на патарините.
„Зарем две години не беа доволни?“
Јанкоски директно го прозва раководството на надлежното претпријатие, барајќи одговори за бавниот процес на модернизација:
„Не ви беа доволни 2 години да ги поставите М-ТАГ уредите на сите патарини во државата? До кога ќе ги малтретирате граѓаните? Секој ден илјадници луѓе патуваат по македонските патишта, а наместо брзо и ефикасно да поминат, чекаат во долги колони поради неажурност и лоша организација. Го прашувам директорот, колку време му треба за да ги постави М-ТАГ уредите на сите патарини во државата?“, прашува Јанкоски.
Предлог за итно решение и долгорочни заштеди
Од ЛДП предлагаат државата веднаш и без одлагање да ја комплетира инсталацијата на М-ТАГ системот на сите наплатни рампи, со цел конечно да се растерети и забрза протокот на возила на клучните патни правци.
„Државата за поставувањето ќе плати еднаш, а придобивките и заштедите на средствата ќе може да ги користи со години“, заклучува Јанкоски во својата изјава.