Македонија

Дурмиши: Засега нема потреба од интервентни мерки за цените

Дурмиши: Засега нема потреба од интервентни мерки за цените

Министерот за економија и труд Бесар Дурмиши оценува дека засега нема индикации за воведување интервентни мерки за намалување на цените, бидејќи, според него, цените и инфлацијата се под контрола.

Меѓу најавените приоритети за следната година се повеќе вработувања, следење на цените, особено на храната, и намалување на административните обврски за малите и средните претпријатија.

Според податоците на Државниот завод за статистика, годишната инфлација во октомври изнесувала 3,3 проценти. На месечно ниво, трошоците за живот пораснале за 0,7 проценти, додека кај храната и пијалаците растот бил 0,4 проценти.

Дурмиши посочува дека Пазарниот инспекторат континуирано врши контроли во маркетите, како и кај дистрибутерите и увозниците. Доколку бидат утврдени нарушувања или прекршувања на Законот за нефер трговски практики, најавува дополнителни контроли и активирање мерки за заштита на животниот стандард.

Во најавите пред брифингот со новинарите беше посочена и целта до крајот на годинава административните постапки за малите и средните претпријатија да се намалат за 50 проценти. Очекуваните заштеди се над четири милиони евра. Најавено е и намалување на 24 парафискални давачки, во согласност со реформската агенда.

За мерките за вработување следната година се планирани 44,4 милиони евра, наспроти 40 милиони евра предвидени со годинашниот оперативен план.

Ноќно студио

Најнова епизода

Дали системот реагира навреме? Ноќно студио со обвинителката Спасенка Андонова

Сите епизоди →
Имате вест, приказна или проблем? Пишете ни