Индискиот премиер Нарендра Моди изјави во средата во Виена дека Индија и Австрија се подготвени да дадат секаква можна поддршка за брзо враќање на мирот и стабилноста во Украина.
„Загубата на невини животи е неприфатлива, каде и да се случи“, им рече Моди на новинарите. Моди пристигна во посета на Австрија по посетата на Русија во понеделникот и вторникот.
„Проблемите не можат да се решат на бојното поле“, рече тој.
„И Индија и Австрија придаваат големо значење на дијалогот и дипломатијата за брзо враќање на мирот и стабилноста“, додаде тој.
Австрискиот канцелар Карл Нехамер исто така истакна дека „заедничката цел“ на двете земји во Украина е: „праведен и траен мир, во согласност со Повелбата на ОН“.
Тој го истакна важното „влијание“ што го има Индија, „најголемата демократија во светот“.
Тој рече дека Австрија, воено неутрална, може да биде „место на дијалог“ за „идните мировни самити“.
Моди во вторникот во Кремљ му кажа на својот „пријател“ Владимир Путин дека продолжувањето со бомбардирањето на Украина нема да ги „реши проблемите“ и повика на изнаоѓање „пат до мир преку дијалог“.
Индија никогаш експлицитно не ја осуди руската инвазија на Украина.
Моди ја посети Австрија по повод 75-годишнината од воспоставувањето на дипломатските односи меѓу двете земји. Тоа е прва посета на индиски премиер на Виена по посетата на Индира Ганди во 1983 година.
Индија и Австрија планираат да ја зајакнат соработката во повеќе области, од економија до имиграција.
Моди во среда ќе се сретне и со австрискиот претседател Александар Ван дер Белен.