Иран воведе сет нови правила за бродовите кои сакаат да поминат низ Ормускиот теснец, објави CNN, повикувајќи се на документ од Техеран.
Документот под наслов „Декларација за информации за пловило“ претставува образец за пријава издаден од Иранската управа за Персискиот Залив (PGSA), кој мора да го пополнат сите пловила што транзитираат низ Ормускиот теснец, со цел да се обезбеди нивен безбеден премин.
Ричард Мид, главен уредник на Lloyd’s List Intelligence, служба за поморски податоци и аналитика, го споделил документот со CNN, а постоењето на образецот го потврдил и втор извор кој сакал да остане анонимен.
Образецот содржи повеќе од 40 прашања, при што секое пловило треба да наведе име, идентификациски број, претходно име, земја на потекло и земја на дестинација. Исто така, се бара и националноста на регистрираниот сопственик, менаџерот и членовите на екипажот.
Иран соопшти дека го ограничува преминот низ пловниот пат за пловила поврзани со САД или Израел. Пред 28 февруари, кога САД и Израел започнаа војна против Иран, бродовите не морале да споделуваат никакви информации за да поминат низ теснецот, изјавил Мид.
Тој за CNN изјавил дека листата на барања „изгледа прилично слично на прашањата за кои знаевме дека веќе им биле поставувани на бродските компании“, но додал дека ова „ја формализира структурата и изгледа како потег на Иран да го нормализира својот авторитет над транзитот“.
Иран во вторникот формираше Управа за Ормускиот теснец и Персискиот Залив (PGSA) со цел да управува со преминот. Според новиот систем, сите бродови што планираат да поминат низ теснецот ќе добијат електронска порака од адреса поврзана со PGSA, преку која ќе бидат известени за правилата за премин, објави иранската државна телевизија Press TV.
Електронската порака од PGSA, која Мид и другиот извор ја споделиле со CNN, содржи предупредување дека „целосни и точни информации се неопходни“ за обработка на барањето за транзит на бродот и дека „дополнителни упатства ќе бидат доставени по електронска пошта“.
Овој потег е најнов чекор во напорите на Техеран формално да ја зацврсти контролата над меѓународниот теснец, низ кој бродовите слободно пловеа пред војната.
