По јавните протести против плановите за испраќање двајца истакнати ирански новинари во затвор, владата им изрази поддршка, јави ДПА.
„Министерот за правда и јас лично го проследивме барањето на адвокатите за амнестија на двајцата новинари до првиот човек на судството“, изјави синоќа министерот за култура Абас Салехи, кој е одговорен за печатот во исламската република. И неговиот ресор и другите министри од кабинетот ќе го следат случајот до неговото завршување, додаде министерот, цитиран од новинската агенција ИСНA.
Протестите во земјава беа поттикнати со судска одлука против амнестијата на двете познати и наградувани новинарки Елахе Мохамади и Нилофар Хамеди. Судот неодамна одлучи тие да почнат со издржување на петгодишната казна.
Новинарите беа меѓу првите во земјата што го пријавија апсењето и подоцна смртта на Махса Амини, млада Иранка со курдско потекло, есента 2022 година. Смртта на Амини предизвика сериозни протести низ целата земја против репресивната политика на исламистичките владетели и, особено, против задолжителното целосно покривање на косата на жените.
Правосудниот систем инсистираше двете жени да бидат испратени во затвор, делумно затоа што тие продолжуваат да го почитуваат законот за шамија и на тој начин одат против исламските вредности на земјата, велат колегите на новинарите.
Семејствата на новинарките и медиумите очекуваа дека ќе бидат ослободени, особено откако летото за претседател беше избран умерениот Масуд Пезешкијан, а потоа за министер за култура беше именуван реформистот Салехи, напомена ДПА.
Откако судските власти донесоа одлука новинарите да започнат со издржување на затворската казна, нивните адвокати ја објавија одлуката јавно, што предизвика протести низ целата земја. Портпаролката на владата Фатемех Мохаџерани тогаш исто така изрази солидарност со двете жени. Во судството на Иран во голема мера доминираат тврдокорни лица кои се обидуваат да спроведат политика на нулта толеранција за критиките на медиумите.