Израелската војска соопшти дека висок функционер на Хезболах бил уапсен во северен Либан. Стотици Израелци се приклучија на антивладиниот протест во Тел Авив.
Претставник на израелската армија изјави дека израелската морнарица заробила висок припадник на радикалната шиитска група Хезболах во северен Либан. Операцијата се одржа во северниот либански град Батроун. Според либанските медиуми, човекот се вика Имад Фадел Амхаз и бил задолжен за поморските операции на организацијата.
Либанскиот премиер Наџиб Микати повика на истрага за киднапирањето. Израелската армија соопшти дека од почетокот на нејзината офанзива во јужен Либан пред нешто повеќе од еден месец, биле убиени околу 2.000 членови на Хезболах.
Израелската армија, исто така, соопшти дека ги ажурирала одбранбените инструкции на командата за цивилна одбрана, со што го подигнала нивото на подготвеност во Долна Галилеја и јужниот дел на Голан од „делумно“ на „целосно“. Во некои општини се дозволени собири до 2.000 луѓе.
Претходно Светската здравствена организација објави дека шест лица, меѓу кои четири деца, се повредени во напад на центар за вакцинација против детска парализа во северниот дел на Газа. Во објава на платформата Х, директорот на организацијата прецизира дека нападот се случил во област каде што била договорена хуманитарна пауза за да може да продолжи вакцинацијата.
Повеќе од 1.500 луѓе протестираа синоќа во Тел Авив барајќи договор за ослободување на израелските затвореници во Појасот Газа и прекин на непријателствата. Незадоволните сметаат дека војската веќе ја добила војната и сега е време политичарите да се позанимаваат со ова прашање.