Македонија годинава одбележува неславен јубилеј – точно 30 години откако за првпат беше напишан закон за оданочување на каматите од банкарските депозити, кој до ден денес остана само мртво слово на хартија. Од 1996 година па наваму, секоја власт најавуваше, па ретерираше, оставајќи ги штедачите во банките во привилегирана даночна положба.
Три децении на „пиши-бриши“
Историјата на овој данок е историја на политички компромиси. Иако законот постои, неговата примена постојано се одложуваше „за подобри времиња“.
„Во изминативе години различни состави на Владата ветуваа законски измени… но потоа сите ретерираа и го одложуваа спроведувањето“, се потсетува во анализата.
Двојни аршини: Акционерите плаќаат, штедачите не
Со последните измени на Законот за данок на личен доход од 2023 година, се создаде интересна ситуација на пазарот на капитал.
- Инвеститори: Од 2023 година стапи на сила оданочувањето на капиталната добивка од хартии од вредност и удели во инвестициски фондови.
- Штедачи: Каматите на орочените депозити останаа недопрени.
Одложено до „Свети ЕУ“
Наместо да се примени веднаш, како што беше случај со другите капитални добивки, данокот на камати доби ново, неодредено одложување.
„Оданочување на каматите од орочени депозити повторно се одложи за примена до денот на пристапувањето на Македонија во Европската Унија“, стои во законското решение.
Оваа политика отвора сериозни прашања за тоа како ваквиот третман влијае врз конкурентноста помеѓу чувањето пари во банка и инвестирањето на берзата, како и врз севкупната македонска економија.
