Новозеланѓанката Керол Кован тврди дека кон крајот на мај била измамена во Загреб. Како што изјавила за „Јутарњи“, таксист ѝ наплатил 1.506 евра за возење од Главната железничка станица до Франкопанска улица, растојание од околу 1,5 километри.
Керол, како што вели, во Хрватска пристигнала на 20 мај. Посетила неколку локации, а на 26 мај стигнала во Загреб. Тогаш одлучила да повика такси.
„Забележав низа автомобили од десната страна, се упатив кон нив и видов висок маж кој се потпираше на автомобил со темна боја. Ми се обрати со ’Hello‘ и ми беше чудно што препозна дека зборувам англиски. Му пријдов и го прашав дали е такси, бидејќи не видов никакви ознаки на возилото. Ми рече дека е.“
„Не можам да си го дозволам, пуштете ме надвор“
Откако ѝ рекол дека прима само готовина, Керол, која имала 65 евра, прифатила. „По кратко време забележав дека таксиметарот покажува 42 и малку се загрижив, но не знаев во кои единици е тоа. Малку подоцна, на семафор, таксиметарот покажуваше 85 евра.“
Кога го прашала дали износот е во евра, тој ѝ покажал ценовник. „Буквите беа премногу ситни за моите слаби очи. Брзо ги пребројав парите во паричникот – имав 65 евра – и му реков: не можам да си го дозволам ова, ве молам, пуштете ме надвор!“
Возачот ја прашал дали има картичка и додал дека на одредиштето ќе ги чека неговиот ’шеф‘ со апарат за картички. „Кога стигнавме на Франкопанска улица, таксиметарот покажуваше 185, а јас плачев. Потоа ми рече дека ќе ми даде попуст и ќе ми наплати ’само‘ 150 евра. Не видов кога пристигна друго возило, но слушнав дека разговараат, а потоа мојот возач го стави апаратот за картички пред моето лице и рече: ’150, во ред?‘ На екранот пишуваше 150 и јас реков – во ред.“
Наплатени 1.506 евра
Возачот тогаш ѝ рекол дека мора да внесе ПИН, ѝ ја зел картичката и сам ја ставил во апаратот. „Го држеше над моето ниво на очи. Јас го внесов ПИН-от, потоа ми ја врати картичката и му го подаде апаратот на некого низ прозорец, а другото возило замина“, вели Керол, која дури подоцна забележала дека не добила фискална сметка. Неколку часа по возењето почнала да се сомнева.
„Ја проверив состојбата на картичката и видов дека се наплатени 1.506 евра! Веднаш пријавив во Виза дека станало грешка. Отидов да барам полициска станица, но се прашував што можам да им покажам како доказ, па се вратив во мојот сместувачки објект“, вели таа.
Сопственикот на фирмата: Јас не ја возев
„Јутарњи лист“ стапи во контакт и со сопственикот на занаетот за авто-такси превоз, Иван Маџар, кој изнел поинаква верзија на настаните. „Јас не ја возев, ја возеше друг таксист кој нема апарат за картички. Тој ме повика и ме праша дали може да му го позајмам мојот. Падна дожд, не гледав што човекот внесува во апаратот“, рекол тој, тврдејќи дека не знаел оти станува збор за толку висок износ.
На прашањето како е можно сумата сепак да се префрлила од неговата сметка, одговорил дека ако се работи за кривично дело, полицијата ќе си ја заврши работата. Додал и дека полицијата сè уште не го контактирала, иако Керол го пријавила целиот случај.
