Македонската музичка сцена тагува – почина Владимир Блажев – Панчо, пејачот, диџејот и продуцентот кој повеќе од две децении беше дел од аренби дуото „ДНК“, заедно со својот партнер Андреја Ѓорѓиески – Андреј.
Панчо ја изгуби битката со последиците од пожарот што избувна на 16 март годинава во дискотеката „Пулс“ во Кочани, во кој животот го загубија повеќе лица, меѓу кои и неговите колеги од бендот. Тој беше меѓу тројцата преживеани од групата ДНК, но со тешки изгореници и долготрајни компликации по здравјето.
По седум месеци лекување во клиники во Скопје, веста за неговата смрт ја потресе јавноста.
Панчо беше вистински симбол на урбаната генерација, човек кој преку музика, текстови и настапи ја дефинираше современата македонска поп и R&B култура. Неговата креативност и харизма го направија омилен лик не само во студиото, туку и на сцената и зад диџеј пултот.
Ретко кој би се сетил за кого станува збор, ако прочитате дека Владимир Блажев снимил нова песна. Сите го знаеја како Панчо од ДНК или како диџеј Шорти Пи. Првиот прекар го добил уште како дете:
„Како мал бев панкер. Момците кои ме пораснаа во маало, Даре, Зоки и Наум, ми направија фризура ‘четка’ кога имав седум години. Оттогаш ме викаат Панчо и ретко кој ми се обраќа со Владимир,“ – знаеше да каже пејачот со насмевка.
И како диџеј, Панчо остави свој белег на домашната клупска сцена, каде настапуваше под уметничкото име Шорти Пи – „Шорти“ затоа што бил низок, а „Пи“ е скратено од Панчо.
Со неговото заминување, Македонија изгуби уметник, визионер и пријател, кој зад себе остави песни, спомени и пораки што ќе живеат уште долго меѓу генерациите што пораснаа со „Благодарам однапред“, „Пази се од мене“, „Ако утре ме нема“ и многу други хитови на ДНК.
Почивај во мир, Панчо. Твојата музика ќе живее засекогаш.