Пациент се третира пред болницата во Струмица. На ова видео се гледа како лекарите му ја даваат терапијата пред влезот на објектот. Ова ги вознемири граѓаните кои се во паника – да не случајно се пополнил капацитетот на леглата. Од Министерството за здравство смируваат – пациентот се третираше надвор, по барање на родителите, а не поради тоа што немаше место внатре.
„Од Струмичката болница нѐ информираа дека пациентот кој се лекува од хроничка бубрежна инсуфициенција примил терапија до вратата на болницата поради тоа што неговите родители не дозволувале да биде внесен во болницата поради тоа што имаат страв од Ковид-19. Тоа е причината зошто на младиот пациент му е дадена терапија пред влезот на болницата“, велат од Министерството за здравство.
Во нашата земја има околу 5.000 активни случаи на Ковид-19 и над 800 починати како последица на вирусот. Здравствените власти загрижени поради замавот кој го добива коронавирус и најавуваат скок на бројот на позитивни случаи.
Поради тоа, МЗ ја забрзува постапката за носење пакет анти-ковид мерки како што се: ограничување на бројот на гости, забрана за собири на јавни места по 22 часот и носење маски на отворено. Владата одлучи – за овие мерки да стапат на сила потребни се измени на Законот за заштита на населението од заразни болести. Филипче објасни дека законот веќе е собраниска постапка и дека очекува да се изгласа следната недела.
Но, ќе дадат ли поддршка сите партии за овие мерки? Лидерот на ВМРО-ДПМНЕ, Христијан Мицкоски, рече дека сѐ уште не знае за какви мерки станува збор и додава дека неговата партија не ги менува ставовите според потребите на Владата, туку дека работат на интерес на граѓаните.
.
