Пензионерите од почетокот на октомври ќе добијат повисоки примања, откако септемвриското усогласување на пензиите ќе биде направено за 3 отсто. Зголемените пензии се исплаќаат во октомври, бидејќи исплатата се однесува на претходниот месец.
Усогласувањето се врши согласно член 37 од Законот за пензиското и инвалидското осигурување, според кој пензиите се усогласуваат двапати годишно – во март и во септември.
Законската формула се пресметува како збир од 50 отсто од порастот на трошоците за живот и 50 отсто од растот на просечно исплатената нето-плата во првото полугодие во однос на претходните шест месеци.
Според податоците на Државниот завод за статистика, во периодот јануари-јуни индексот на трошоците на животот бележи раст од околу 1,17 отсто. Тоа во формулата учествува со околу 0,585 отсто.
Во истиот период просечната нето-плата пораснала за околу 4,75 отсто, што во законската формула носи придонес од 2,375 отсто.
Со собирањето на двата удела се добива усогласување од околу 3 отсто, бројка која е потврдена и од Фондот на пензиското и инвалидското осигурување (ПИОМ).
Така, пензионерите зголемените септемвриски пензии ќе ги добијат со октомвриската исплата.