Полицајците кои беа ангажирани во првите редови за време на протестите во Тирана ќе добијат по 2.500 евра парична награда, најави албанскиот премиер Еди Рама. Одлуката била соопштена на средба со полициските раководители на 19 октомври, на која присуствувал и министерот за внатрешни работи Ервин Демо, објави „Еуроњуз Албанија“.
Рама најави дека средствата ќе бидат достапни веднаш и дека сите полицајци опфатени со мерката ќе добијат ист износ, без оглед на висината на нивната редовна плата. Како образложение за одлуката, тој ги посочи притисокот со кој се соочуваат полициските службеници и дополнителните трошоци што ги имаат во актуелниот период.
Најавено и зголемување на платите од јануари
Освен еднократната парична награда, албанскиот премиер најави и значително зголемување на платите во полицијата, кое треба да стапи во сила од 1 јануари. Според Рама, за оваа мерка се разговарало неколку недели претходно, во рамките на подготовките за новиот државен буџет.
Тој оцени дека платите на полициските службеници во изминатите години не биле зголемувани во доволна мера. На средбата, Рама ги осуди нападите врз полицајците и изрази поддршка за нив и за нивните семејства.
Најавите следуваат по протестите што се одржаа претходната вечер во Тирана. Еднократната награда е наменета за полицајците распоредени во првите редови, додека зголемувањето на платите е поврзано со новиот буџет. Рама засега не го соопшти процентот на најавеното покачување.