Се зголемува бројот на жртвите од силниот земјотрес што во саботата го погоди Авганистан, а според новите официјални податоци што во неделата ги објави талибанската влада, загинале повеќе од две илјади луѓе, а над девет илјади се повредени.
По земјотресот со јачина од 6,3 степени според Рихтеровата скала што во саботата го погоди регионот на околу 30 километри северозападно од градот Херат, потоа следеа уште осум силни потреси.
2.053 лица загинаа, а 9.240 се повредени, соопшти во неделата Министерството за катастрофи.
Тој додава дека уништени или оштетени се 1.329 куќи.
Претходно во неделата, портпаролот на Црвениот крст Ерфанула Шарафзои изјави за Ројтерс дека загинале 500 луѓе.
Повеќе од 200 мртви се донесени во неколку болници, изјави претставник на Министерството за здравство кој се претстави како доктор Даниш и додаде „Повеќето од нив се жени и деца, а 510 се повредени“.
Во селото Сарболанд во областа Зинда Јан беа збришани десетици куќи, јавува новинар на АФП.
Провинцијата Херат, која според податоците на Светската банка има околу 1,9 милиони жители, во последните години е погодена од суша, која парализираше бројни земјоделски заедници кои и онака се во тешкотии.
Земјотресите во Авганистан се чести, особено во планинскиот венец Хинду Куш, кој е во близина на спојот на евроазиската и индиската тектонска плоча.
Во јуни 2022 година, земјотресот со јачина од 5,9 степени според Рихтеровата скала беше најсмртоносниот во Авганистан во последните 25 години, при што загинаа повеќе од илјада луѓе, а десетици илјади останаа без покрив над главата во сиромашната провинција Пактика (југоисточно).
Во март годинава во земјотрес од 6,5 степени загинаа 13 лица во Авганистан и Пакистан, во близина на месноста Џурм на североистокот на земјата.
Авганистан исто така е во тешка хуманитарна криза откако Талибанците се вратија на власт во 2021 година, чие владеење не е признаено од меѓународната заедница.