Министерството за одбрана на Обединетото Кралство соопшти дека Русија цели на населени области во Украина, „најверојатно“ како обид да се скрши украинскиот морал.
„Размерите и силата на украинскиот отпор продолжуваат да ја изненадуваат Русија. Таа одговори со таргетирање на населени области на повеќе локации, вклучувајќи ги Харков, Чернихив и Мариупол“, соопшти Министерството во последното известување за Украина во неделата.
„Ова веројатно претставува обид да се скрши украинскиот морал“, се додава.
Русија претходно користеше слични тактики во Чеченија во 1999 година и Сирија во 2016 година, употребувајќи и воздушна и копнена муниција, додаде Министерството.
„Руските линии за снабдување, наводно, продолжуваат да бидат цел, забавувајќи ја стапката на напредување на нивните копнени сили. Постои реална можност Русија сега да се обидува да ги скрие камионите со гориво како редовни камиони за поддршка за да ги минимизира загубите“, заклучи Министерството.