Руското Министерство за надворешни работи денеска соопшти дека прогласило 34 француски дипломати за персона нон грата, кои мора да ја напуштат Русија во рок од две недели, пренесоа ТАСС и Ројтерс.
„На 18 мај, амбасадорот на Француската Република, Пјер Леви, беше повикан во руското Министерство за надворешни работи. Беше нагласено дека овој чекор предизвикува сериозна штета на руско-француските односи и конструктивната билатерална соработка“, соопшти Министерството.
„Како одговор, 34 соработници на француските дипломатски мисии во Русија беа прогласени за персона нон грата. „Им беше наредено да ја напуштат Русија во рок од две недели по добивањето на нотата од амбасадорот“, соопшти Министерството.
Француското Министерство за надворешни работи соопшти дека ја осудува одлуката на Русија да ги протера дипломатите.
Во април Франција протера 35 Руси со дипломатски статус. Подоцна истиот месец, француското Министерство за надворешни работи прогласи шест руски агенти кои се претставувале како дипломати персона нон грата, откако внатрешната разузнавачка истрага заклучи дека тие работат против националните интереси на Франција, објави Ројтерс.
