На денешната прес-конференција, членот на Извршниот одбор на СДСМ, Андреј Жерновски, упати серија обвинувања на адреса на премиерот Христијан Мицкоски, поврзувајќи го со, како што рече, пошироки регионални политички и економски мрежи.
-Падот на авторитарниот режим на Виктор Орбан има директни последици не само врз целиот регион, туку и врз оние политичари коишто беа под негова директна заштита. Тука секако спаѓа и Христијан Мицкоски, наречен „Орбан Џуниор“, рече Жерновски.
Тој наведе дека дел од меѓународните анализи ја опишуваат оваа мрежа како систем кој опфаќа медиуми, финансиски текови и бизнис интереси, во кој, според неговите тврдења, се поврзуваат политички актери од регионот.
Во своето обраќање, Жерновски посочи дека дел од европските медиумски и политички оценки ги опишуваат одредени регионални лидери како дел од поширок контекст на „авторитарни политички структури“, ставајќи ги во иста група со лидери од Балканот.
Тој оцени дека ваквите случувања претставуваат поширока политичка битка меѓу демократските и авторитарните тенденции во регионот, нагласувајќи дека тоа ќе биде едно од клучните прашања во идниот политички период.
Жерновски исто така изјави дека ќе побара темелна истрага за, како што тврди, можни финансиски и деловни врски меѓу политички структури во Македонија и Унгарија.
Во завршницата, тој упати повик до надлежните институции да постапат во однос на прашањето за екстрадиција на поранешниот премиер Никола Груевски, повикувајќи се на неодамнешни политички изјави од Унгарија.
Засега нема реакција од другите политички партии и засегнатите лица на изнесените обвинувања.
