Канада и Соединетите Американски Држави постигнаа договор за отворање на Меѓународниот мост „Горди Хау“ на 27 јули, што во петок го потврдија од канадската влада. Мостот, кој треба да ги зајакне северноамериканските синџири на снабдување и да го подобри протокот на стоки, ја доби и поддршката од американската администрација, објавија странски медиуми.
Во рамките на договорот, Канада и САД усогласија мерки за управување со наплатата на патарина и за транспарентност. Тоа вклучува основање петнаесетгодишен фонд за економски развој што ќе се финансира од дел од добивката од работењето на мостот, се наведува во соопштението. Управата за мост Виндзор–Детроит ќе соработува со САД околу приспособувањето на цените на патарината и ќе бара согласност за одредени промени што не се врзани за пазарните услови.
„По години планирање, партнерство и градба, меѓународниот мост ‘Горди Хау’ наскоро се отвора. Тој ќе обезбеди нова врска за регионот и истовремено ќе го зајакне еден од најважните светски трговски коридори“, изјави Грегор Робертсон, канадскиот министер за домување и инфраструктура. „Овој национален проект сведочи за тоа што Канада може да постигне кога се обединуваме околу заедничка визија.“
Гувернерката на американската сојузна држава Мичиген, Гретчен Витмер, го поздрави договорот. „Илјадници работници од Мичиген го градеа овој клучен мост, кој ќе го забрза производството на автомобили, ќе ги намали трошоците, ќе го олесни сообраќајот и ќе го зајакне земјоделството. На луѓето од двете страни на границата ќе им донесе подобро платени работни места и посветла иднина“, рече таа. „Овој мост сведочи за трајното партнерство на Мичиген и Канада и за тоа што можеме да постигнеме кога размислуваме крупно и вложуваме во нашата заедничка иднина.“
Објавата ја поздрави и американскиот претседател Доналд Трамп. „Постигнав МНОГУ ПОДОБАР ДОГОВОР за Америка, со што ќе овозможам новиот и спектакуларен меѓународен мост ‘Горди Хау’, кој ги поврзува Детроит и Виндзор во Онтарио, да се отвори на 27 јули, како што и беше планирано“, напиша на својата друштвена мрежа Трут Соушл. Претходниот договор за мостот го опиша како „неприфатлив“, додавајќи: „Новиот договор е одличен и правичен.“ „Благодарам и честитки до канадската влада. Нека оваа прекрасна нова иницијатива им донесе многу години успех на двете наши земји“, заклучи тој.
Меѓународниот мост „Горди Хау“ е клучен премин што ги поврзува Виндзор во Онтарио и Детроит во Мичиген, осмислен за унапредување на прекуграничните патувања и транспортот на товар. Според соопштението на канадското министерство, низ коридорот Виндзор–Детроит секојдневно минува стока вредна стотици милиони долари, што го прави најпрометниот меѓународен копнен граничен премин во Северна Америка. Според Договорот за премин меѓу Канада и Мичиген од 2012 година, Канада целосно ги финансираше трошоците за изградба. За возврат, Отава ќе ги прибира приходите од патарина сè додека не ја надомести својата инвестиција, по што Мичиген ќе има право на 50 проценти од нето-добивката.