Републиканскиот претседателски кандидат и поранешен американски претседател Доналд Трамп изјави дека пред неговиот говор на митинг во Пенсилванија минатата недела, кога напаѓач го рани во уво, никој не го предупредил дека има проблем.
„Никој не спомна, никој не рече дека има проблем. Можеа да кажат ајде да почекаме 15 минути, 20 минути, 5 минути. Но, никој ништо не кажа“, рече Трамп во интервју за Фокс њуз.
Тој додаде дека мислел дека е грешка и прашал како некој дошол до тој покрив (од кој пукал напаѓачот) и зошто не бил пријавен, бидејќи луѓето го виделе на покривот. „Вашингтон пост“ во саботата објави дека високи функционери на американската тајна служба постојано, пред атентатот, ги одбивале барањата на обезбедувањето на Трамп да ангажира дополнителен персонал и опрема, пренесува Ројтерс.
Според весникот, Тајната служба, која е одговорна за заштитата на Трамп, ги одбила овие барања, понекогаш наведувајќи го недостатокот на ресурси како причина.
Тој ги отфрли обвинувањата дека е опасност за демократијата, велејќи дека минатата недела „зел куршум за демократијата“.
Трамп, говорејќи на првиот состанок на Републиканската партија по неговиот атентат минатата недела, ја отфрли и поврзаноста со таканаречениот „Проект 2025“.
„Велат дека некои екстремни десничари создале Проект 2025, немам поим што е тоа. Тие велат дека сум опасност за демократијата, а минатата недела земав куршум за тоа“, рече Трамп.
Нему на подиумот му се придружи сенаторот од Охајо, Џ.Д. Венс, кого го избра за свој потпретседател.
„Тој се залага за оние кои работат напорно. Тој ќе биде одличен потпретседател“, рече Трамп. Тој додаде дека на говорницата во Мичиген се појавил само, како што рече, благодарение на Божјата помош. „Да се разбереме, нешто посебно се случи минатата недела. Овде сум само со Божја помош, инаку не би бил пред вас“, рече Трамп.