Сега веќе поранешната британска премиерка Лиз Трас денеска во своето последно обраќање на функцијата пред седиштето во Даунинг стрит изјави дека Британија ја чекаат подобри денови.
– Британија ја продолжува тешката битка, но јас верувам во оваа земја и британскиот народ и знам дека доаѓаат подобри денови, изјави Трас.
Таа на својот наследник Риши Сунак му посака успех на премиерската функција, наведувајќи дека сè уште верува во висок економски раст и во политиката на намалување на даноците.
Трас потоа отиде да се сретне со британскиот крал Чарлс Трети и формално поднесе оставка.
Трас ја вршеше функцијата најкратко од сите британски премиери – само шест недели.