Лијам Картер (34) го пронашол добитниот лист за лото три дена по смртта на неговата мајка Ана, па верува дека тоа било нејзиниот „последен дар“ за него. Листот бил уредно преклопен во плик, на кој Ана, страстна играчка на лото, рачно напишала: „Саботно извлекување – не заборавај!“.
Таа починала на 16 април, во возраст од 67 години, само два дена пред да бидат извлечени нејзините броеви, пишува Дејли Мејл. Иако играла секоја недела, никогаш не добила нешто големо. Картер го пронашол листот во комодата, точно таму каде што мајка му обично ги чувала листите.
„Секогаш велеше дека ако некогаш добие, парите ќе бидат за мене. И иако никогаш не дознала за овој добиток, чувството беше како да ми го оставила. Како последен подарок“, изјавил Картер.
На листот имала пет главни броеви – 20, 27, 35, 39 и 48 – промашени се само два дополнителни броја, 03 и 08. Тоа значело дека Ана освоила 18.403 фунти. Картер првично речиси го занемарил листот, но нешто го „натерало да го провери“.
„Го скенирав преку апликацијата и се покажа дека комбинацијата е добитна, но дека треба да се јавам во службата за корисници“, раскажал тој.
Изненаден бил кога му рекле колку е износот на добитокот.
„Мислам дека само се згрчував на телефонот. Не ми се чинеше вистински. Никогаш не добила нешто големо, а сега ова“, додал тој.
Парите планира да ги искористи за аванс за стан, што, како што вели, била една од најголемите желби на мајка му.