Царинските службеници на граничниот премин Табановце спречиле обид за нелегално внесување 200.000 евра непријавени девизни средства во земјава.
При влез во државата, унгарски државјанин не ги пријавил парите кај царинските службеници, по што неговото возило било селектирано за детална контрола поради сомнеж.
При прегледот, помеѓу менувачот во ташна била пронајдена црна платнена торбичка со 65.000 евра. Во ранец кој се наоѓал на задното седиште, покриена со компјутер, била пронајдена уште една мала црна торбичка со 37.650 евра.
Во куфер на задното седиште, меѓу гардеробата, цариниците пронашле и трета црна торбичка во која имало 97.350 евра.
Вкупната сума на непријавени парични средства изнесувала 200.000 евра. Согласно Законот за девизно работење, на патникот му биле вратени 10.000 евра, додека преостанатите 190.000 евра биле задржани со Потврда за задржани средства.
Против унгарскиот државјанин е поднесена соодветна прекршочна пријава.