Уставниот суд денеска треба да ја разгледа законитоста на одредби од Законот за прекршоците поврзани со системот „Безбеден град“. Седницата е закажана за 9:30 часот, а предметот е ставен на дневен ред на 7. седница на Судот како обединет по три иницијативи за оценка на уставноста и законитоста на одредби од законот.
На дневниот ред се оспоруваат член 28 став 8, член 29 став 4, членовите 48-а, 48-б, 48-в, 48-г и член 83 став 8, кои се однесуваат на автоматското евидентирање и процесирање на сообраќајни прекршоци, како и на начинот на достава и прифаќање или неприфаќање на одговорност за сторен прекршок.
Трите иницијативи доаѓаат од различни подносители: Зијадин Села, Илире Даути и Елми Азири; Или Пачуку; и Алијанса на Албанците преку Арбен Таравари. Претходно беше соопштено дека ќе се разгледуваат заедно, што сега е потврдено и во официјалниот дневен ред на Судот.
Клучните приговори се насочени кон повеќе точки: обврската граѓаните да имаат телефонски број и електронска адреса за да примаат известувања, употребата на јазиците во електронската комуникација, како и нерамномерната примена на системот само во Скопје, Тетово и Куманово, што според подносителите може да ја загрози еднаквоста на граѓаните. Во некои иницијативи се оспорува и нејасната и временски неограничена „пилот фаза“.
Денешната седница има поголемо значење од обичен сообраќаен проект, бидејќи ќе ја дефинира рамката за дигиталната контрола и санкционирање во државата. Од расправата ќе зависи дали Уставниот суд ќе поведе подлабока постапка за оценка на спорните одредби или ќе го остави системот да продолжи без уставно-судска пречка.
