Актуелниот црногорски претседател Мило Ѓукановиќ во вториот круг од претседателските избори ќе се соочи со прозападниот поранешен министер за економија Јаков Милатовиќ, откако ниту еден од нив не успеа да добие повеќе од 50 отсто во првиот круг од изборите во неделата, објавија Ројтерс.
По пребројувањето на 99,7 отсто од репрезентативниот примерок на гласови, преброени од Центарот за мониторинг и истражување, Ѓукановиќ доби 35,3 отсто, а Милатовиќ, потпретседател на движењето Европа сега, 29,2 отсто од гласовите.
Милатовиќ го дефинираше својот изборен резултат како победа за „убава, подобра, фер (…) и европска Црна Гора. „Направивме одлучувачки чекор кон (вториот круг на) 2 април (…) и кон сигурна победа“, рече тој.
На третото место се најде Андрија Мандиќ, лидер на Демократскиот фронт, кој бара поблиски врски со Србија и Русија. По неговата елиминација, тој најави поддршка за Милатовиќ во вториот круг. „Не може да има победа во вториот круг без поддршка на Демократскиот фронт. (…) Ја давам мојата целосна поддршка на Милатовиќ“, рече Мандиќ.
Официјалните резултати најверојатно нема да бидат објавени неколку дена поради процедурите за приговори.