Министрите за внатрешни работи на ЕУ ќе разговараат за ситуацијата во Украина и прашања поврзани со очекуваната бегалска криза по руската инвазија на Украина, објави Ројтерс.
Францускиот министер за внатрешни работи Жерар Дарманен, кој ќе претседава со состанокот, на Твитер објави дека целта на состанокот е да се најдат конкретни решенија за Украина.
Германската министерка за внатрешни работи Ненси Фајзер во четвртокот изјави дека Германија ќе понуди поддршка за Полска и другите источноевропски земји кои се соочуваат со прилив на бегалци.
Според ОН, најмалку 100.000 луѓе се протерани од своите домови, бегајќи од непријателствата. Неколку илјади веќе се преселиле во соседните земји, вклучувајќи ги Молдавија, Романија и Полска, изјави портпаролката на Агенцијата за бегалци на ОН Шабија Манту на брифингот на ОН во Женева. Агенцијата очекува до 5 милиони Украинци да ја напуштат својата татковина.