Поглаварот на Српската православна црква (СПЦ) Порфириј денеска ја призна автокефалноста на МПЦ на заедничката литургија на СПЦ и Македонската православна црква (МПЦ) – Охридска архиепископија во Скопје, а СПЦ одлуката официјално ја објави на својата веб-страница.

„Светиот архиерејски синод едногласно излезе во пресрет на барањата на Македонската православна црква – Охридска архиепископија и ја благословува, одобрува, прифаќа и признава автокефалноста“, рече патријархот Порфириј во говорот на литургија во Скопје.

Затоплување на односите меѓу двете цркви

Литургијата на која беше објавено признавањето на автокефалноста се одржа на денот на светите словенски просветители Кирил и Методиј.

Денешната заедничка богослужба во Скопје е продолжение на затоплувањето на односите меѓу двете цркви, кое започна на 17 мај во црквата Свети Сава во Белград со „литургија на помирување“.

Претходно, Вселенската (Цариградската) патријаршија ја призна црковната хиерархија предводена од архиепископот Стефан за „канонска и валидна во сеправославниот свет“ и формираше „канонска и литургиска заедница“ на МПЦ, соопшти Светиот синод на Вселенската патријаршија. .

Со таа одлука заврши деценискиот раскол наметнат на Охридската архиепископија.

Беа во долготрајна расправија

Српската православна црква е во долгогодишен спор со Македонската православна црква-Охридска архиепископија, оспорувајќи ја нејзината автокефалност.

Во денешното соопштение на СПЦ по заедничката литургија во Скопје се наведува дека Синодот на СПЦ како црковна влада и патријархот Порфириј во соработка со Архиепископот Стефан и Синодот на МПЦ ќе ги разработат „сите технички и организациски детали“.и известување до „сите помесни православни цркви“.

Тоа ќе биде и покана до овие цркви „да го прифатат автокефалниот статус на Македонската православна црква – Охридска архиепископија според нивниот канонски ред“.

„Ние се радуваме на Господа затоа што пред нашите очи се случува чудо, а ние сме недостоен дел од тоа чудо, учесници во тоа чудо. Господ не удостои да оздрави она што е разделено од 1967 година“, рече лидерот на СПЦ во Скопје.